L-obbligi ta’ min iħaddem b’rabta mal-pensjoni

Skont ir-regoli tal-UE, min iħaddem għandu obbligi legali speċifiċi relatati kemm mal-pensjonijiet obbligatorji (il-pensjonijiet tas-sigurtà soċjali tal-istat) kif ukoll mal-pensjonijiet okkupazzjonali supplimentari.

Il-pensjonijiet tas-sigurtà soċjali

Għalkemm kull pajjiż tal-UE huwa responsabbli għall-ġestjoni tas-sistema tal-pensjonijiet tiegħu, ir-regoli tal-UE jiżguraw li jkun hemm koordinazzjoni bejniethom jekk ikun hemm element transfruntier f’sitwazzjoni ta’ ħaddiem.

Bħala impjegatur, trid tirreġistra lill-impjegati fis-sistema tas-sigurtà soċjali tal-pajjiż fejn ikunu jaħdmu. F’każ li impjegati jmorru jaħdmu għalik f’pajjiż ieħor tal-UE, trid tiżgura li jkunu miktubin fis-sistema nazzjonali tas-sigurtà soċjali u jħallsu l-kontribuzzjonijiet skont ir-regoli lokali.

Meta l-ħaddiema jiġu biex jirtiraw, kull pajjiż li fih ikunu ħadmu jikkalkula l-intitolament tal-pensjoni tagħhom separatament, fuq il-bażi tal-perjodi ta’ assigurazzjoni li jkunu akkumulaw f’kull pajjiż. L-impjegati rtirati mbagħad jirċievu pagamenti separati minn kull pajjiż.

Jekk impjegati jintbagħtu jaħdmu temporanjament f’pajjiż ieħor (għal perjodu sa 24 xahar), trid tapplika għal formola tad-dokument portabbli A1, biex l-impjegati jinżammu taħt is-sistema tas-sigurtà soċjali tal-pajjiż minn fejn ikunu ntbagħtu.

Il-pensjonijiet okkupazzjonali supplimentari

Il-pensjonijiet okkupazzjonali supplimentari huma pensjonijiet ipprovduti permezz ta’ skema stabbilita minn min iħaddem jew mis-sħab soċjali flimkien, u huma differenti mill-pensjonijiet tas-sigurtà soċjali.

Jekk impjegati jitilqu mill-kumpanija tiegħek u jmorru f’pajjiż ieħor, trid tiżgura li d-drittijiet akkumulati tal-pensjoni supplimentari tal-impjegati ma jintilfux. Dan ifisser li l-impjegati ma jitilfux il-benefiċċji tal-pensjoni li jkunu kisbu sa dak il-punt. Barra minn hekk, id-drittijiet inattivi tal-pensjoni tagħhom iridu jiġu ttrattati l-istess bħal dawk tal-ħaddiema li qatt ma ċċaqilqu lil hinn mill-fruntiera - sal-mument meta jsir il-ħlas tal-pensjoni.

Lill-impjegati trid tagħtihom informazzjoni ċara u dettaljata dwar id-drittijiet tal-pensjoni supplimentari tagħhom, speċjalment meta jkunu jixtiequ jitilqu mill-kumpanija u jmorru barra mill-pajjiż. Din tinkludi informazzjoni dwar kif jiġu kkalkulati l-benefiċċji, kif jinżammu, u l-kundizzjonijiet għall-kapitalizzazzjoni u t-trasferiment eventwali tad-drittijiet akkwiżiti tal-pensjoni.

Jekk impjegati jkunu jridu jikkapitalizzaw u jittrasferixxu d-drittijiet tal-pensjoni supplimentari tagħhom għal skema tal-pensjoni ġdida f’pajjiż ieħor, fejn ikun possibbli għandek tipprova tiffaċilita l-proċess. Madankollu, mhux l-iskemi kollha jippermettu li jsiru trasferimenti, u dan jiddependi fuq ir-regolamenti nazzjonali u fuq ir-regoli speċifiċi tal-fornitur tal-pensjoni.

Trid tiżgura wkoll li ż-żmien li l-impjegati jridu jkunu rreġistrati fi skema tal-pensjoni qabel ma jiksbu d-drittijiet ma jkunx itwal minn tliet snin.

L-iskemi tal-pensjoni pan-Ewropej

Jekk topera f’aktar minn pajjiżi wieħed, ikkunsidra li taħdem b’fornitur transfruntier tal-pensjoni, magħruf ukoll bħala Istituzzjoni għall-Provvista ta’ Rtirar Okkupazzjonali (Institution for Occupational Retirement Provision, IORP). Dan jiffaċilitalek il-ġestjoni tal-pensjonijiet fil-pajjiżi kollha u jiżgura li tkun qed timxi mar-regoli tal-UE.

Bħala impjegatur, il-kompitu ewlieni tiegħek huwa li tagħżel IORP li tissodisfa l-istandards kollha meħtieġa. Tkun trid tara xi strateġija jkollhom għall-ġestjoni u għall-investiment, inklużi l-fatturi ambjentali, soċjali, u ta’ governanza (ESG).

Tkun trid tara wkoll kif tagħmilha faċli għall-impjegati biex jittrasferixxu l-pensjoni tagħhom minn pajjiż għall-ieħor jekk jagħżlu li jagħmlu dan. Dan ifisser li trid tagħżel IORP li tkun kapaċi tiġġestixxi t-trasferimenti internazzjonali tal-pensjonijiet u li żżomm lill-impjegati infurmati dwar il-pensjoni tagħhom u dwar kwalunkwe spejjeż assoċjati magħha.